Star7. சகிப்புத்தன்மை அற்ற மாசுச்சூழல்

நடந்தேறிய சில நிகழ்வுகளை பார்க்கும்போது, அகிம்சை, மத நல்லிணக்கம், சகிப்புத்தன்மையை போதித்த காந்தி பிறந்த மண்ணில் தான் நாமும் வாழ்கிறோமா என்ற சந்தேகம் எழுகிறது. உதட்டளவில் மகாத்மாவுக்கு சேவை செய்யும் அரசியல்வாதிகள், அவரைப் பற்றிச் சிந்திப்பதை எப்போதோ நிறுத்தி விட்டார்கள்!

சில சாம்பிள்கள்:

1. ஒரு பழுத்த அரசியல் தலைவரான கலைஞர், ராமரைப் பற்றிக் கூறிய கருத்துகள் வால்மீகி ராமாயணத்தில் இருப்பதாக வைத்துக் கொண்டாலும், அவரது பேச்சு ராமரை வைத்து அரசியல் செய்பவர்களுக்கு எதிரானது என்று கொண்டாலும், அது மத நம்பிக்கையை கொச்சைப்படுத்துவதும், ஒரு மௌனப் பெரும்பான்மையை (அவருக்கு வாக்களித்தவர்களும் அதில் அடக்கம்!) காயப்படுத்துவதுமாகும் என்பதை அவர் உணர முடியாதவர் என்பதை ஏற்றுக் கொள்ள முடியாது அல்லவா? ஒரு இறை மறுப்பாளர் அப்படிப் பேசியதில் தவறில்லை என்று கேட்பவர்களுக்கு ஒரு கேள்வி: சென்ஸார் அனுமதி வழங்கிய டாவின்ஸி கோட் திரைப்படத்தை, மத நம்பிக்கையை காரணம் காட்டி தடை செய்தது ஏன் ?

2. அதைத் தொடர்ந்து, பெங்களூரில் பேருந்து எரிக்கப்பட்டதில், இரண்டு அப்பாவிகள் பலியானார்கள். கலைஞரின் மகள் வீடும் தாக்கப்பட்டது. "கண்ணுக்கு கண்" என்பது உலகத்தையே குருடாக்கி விடும் என்று காந்தி சொன்னதை நினைவு கூர்வது அவசியமாகிறது.

3. முதல்வரின் தலைக்கு விலை பேசிய வேதாந்தியின் சகிப்புத் தன்மை குறித்து என்னத்த சொல்ல!!!

4. பெங்களூரில் நடந்த வன்முறைக்கு பதிலாக, திமுகவினர் தமிழ்நாட்டிலுள்ள பிஜேபி அலுவலங்கள் மற்றும் தலைவர் வீடுகள் மீது தாக்குதல் மேற்கொண்டனர்.

5. ஒரு வாக்குப்பதிவு நடத்தி வெளியிட்டதற்காக, தினகரன் அலுவலகம் தாக்கப்பட்டதும், மூன்று அப்பாவிகள் பலியானதும், நமது அரசியல் சூழலின் அழுகலை (நன்றி: ரோசா வசந்த்) வெளிச்சம் போட்டுக் காட்டுகிறது.

6. சமீபத்தில் சன்டிவி DTH தொடங்கப் போவதாக அறிவித்தவுடன், கேபிள் டிவி ஆபரேட்டர்கள் கேபிள் ஒயர்களை அறுத்து வன்முறையில் ஈடுபட்டது நினைவிருக்கலாம். எந்தப் பிரச்சினைக்கும், பேச்சு வார்த்தை மூலம் சுமுகமாக தீர்வு காணலாம் என்பது கால தாமதமாகவே உணரப்படுவது துரதிருஷ்டமே!

7. பால் தாக்கரேயை வில்லனாக சித்தரித்ததாகக் கூறிக் கொண்டு, அவுட்லுக் மீது சிவசேனா தொ(கு)ண்டர்கள் மேற்கொண்ட வன்முறை இன்னொரு உதாரணம்!

8. நந்திகிராம், சிங்கூர் (state sponsored) வன்முறை குறித்து பேசாமல் இருப்பதே நலம்!

9. நம் கலாச்சாரக் காவலர்கள் அரசியல் கட்சித் தலைவர்களின் அனுமதியுடன், குஷ்பு விவகாரத்தின்போது அடித்த கூத்து பற்றி சொல்லவே வேண்டாம்! நாம் எதை நோக்கிச் சென்று கொண்டிருக்கிறோம் என்று புரியவில்லை.

10. உத்திரப்பிரதேசத்தில், பெரியார் எழுதியதின் மொழிபெயர்ப்பான 'சச்சி ராமாயணம்' என்ற புத்தகத்தை வெளியிடக்கூடாது என்று பிஜேபியும், பஜ்ரங்தள்ளும் பயங்கர எதிர்ப்பு தெரிவித்து வருகின்றன. இந்தப் பிரச்சினையில் காங்கிரஸ், சமாஜ்வாடி கட்சிகள் கூட சட்டசபையில் பிஜேபிக்கு ஆதரவாக செயல்படுவது நல்ல காமெடி!

11. ஏதோ ஒரு வடநாட்டுக் கோயிலில், ராவணன் சிலையை பிரதிஷ்டை செய்யக்கூடாது என்று ஒரு கூட்டம் கலாட்டா செய்ததில், அது நிறுத்தப்பட்டது.

12. ஒரு காஷ்மீரத்து பள்ளியில், இஸ்லாமியச் சிறுமிகளை 'வந்தே மாதரம்' பாடலை பாட வைத்து விட்டதற்கு, 'இஸ்லாம் இறை உருவ வழிபாட்டுக்கு எதிரானது' என்ற காரணத்தை முன் வைத்து தேவையில்லாத சர்ச்சை எழுந்துள்ளது. தேசத்தை தாயாக பாவித்து எழுதப்பட்ட ஒரு பாட்டை குழந்தைகள் பாடியதை வைத்து பிரச்சினை செய்ய வேண்டிய அவசியம் தான் என்ன?

13. கடந்த சில வருடங்களாக 'Valentine's Day' கொண்டாடிய இளைஞர்/இளைஞிகள் மீது வடநாட்டு (VHP/BajrangDal) கலாச்சாரக் காவலர்கள் ஏவி விட்ட வன்முறை குறித்து பல செய்திகள் வந்துள்ளன. தமது தலைவர்கள் "அப்பழுக்கற்றவர்கள்" என்று தவறாக எண்ணிக் கொண்டு தான், அவர்களின் தொண்டர்கள் இம்மாதிரி விரும்பத்தகாத வன்முறையில் ஈடுபடுகிறார்கள் என்பது தான் மிகுந்த நகைப்புக்குரியது!

14. சமீபத்தில் தஸ்லிமாவின் விசாவை ரத்து செய்யக் கோரி நடந்த பேரணியின் தொடர்ச்சியாக நடந்தேறிய கல்கத்தா வன்முறையிலும், நந்திகிராம் வன்முறையிலும், மூன்று விஷயங்கள் யோசிக்கத் தக்கவை. ஒன்று, புகைந்து கொண்டிருக்கும் (மக்களின்) எரிச்சலையும், கோபத்தையும் எவ்வளவு சுலபமாக பற்ற வைத்து வன்முறையாக மாற்ற முடிகிறது என்பது, இரண்டு, மக்களுக்கு அரசு இயந்திரங்கள் மற்றும் ஜனநாயக முறையில் எதிர்ப்பைத் தெரிவிக்கும் வழிகள் மீதுள்ள நம்பிக்கையின்மை, மூன்று, அரசியல் கட்சிகளே சமூக விரோத சக்திகளை ஊக்குவிப்பது!

என்றென்றும் அன்புடன்
பாலா